పెద్ద నోట్ల రద్దు తర్వాత.. కాగితం నోట్లకు ప్రత్యామ్నాయంగా డిజిటల్ కరెన్సీకి పట్టం పడుతోంది కేంద్ర ప్రభుత్వం. ఏపీ సీఎం చంద్రబాబు నేతృత్వంలో ఏర్పాటైన సబ్‌ కమిటీ ఢిల్లీలో సమావేశమై.. డిజిటల్ లావాదేవీలపై సమగ్రంగా చర్చించింది. సైబర్‌ సెక్యూరిటీ నుంచి వినియోగదారులకు ప్రోత్సాహకాల వరకు.. అనేక అంశాలపై సబ్‌ కమిటీ కసరత్తు చేసింది.
ఇక దేశంలో అన్నిటికీ ఆధారే ఆధారం కానుంది. ఆధార్‌ నెంబర్‌ మీదుగానే డిజిటల్ లావాదేవీలు జరుగుతాయని చంద్రబాబు అధ్యక్షతన ఏర్పాటైన ఉపసంఘం స్పష్టం చేసింది. వివిధ దేశాల్లోని అత్యుత్తమ డిజిటల్ చెల్లింపుల‌పై కమిటీ చర్చించింది. నగదు రహిత లావాదేవీల పెంపుదలకు ప్రోత్సాహకాలు ప్రకటిస్తామని చంద్రబాబు తెలిపారు. డిజిటల్ లావాదేవీలకు దేశంలోని బ్యాంకులన్నీ ముందుకు రావాలని పిలుపిచ్చారు. వచ్చే మూడు నెలల్లో 13 లక్షల స్వైపింగ్‌ మిషన్లు, అంతే మొత్తంలో బయోమెట్రిక్‌ పరికరాలు అందుబాటులోకి తీసుకొస్తామని చెప్పారు. డిజిటల్ లావాదేవీలు పెరుగుతున్నందున.. సైబర్‌ భద్రతపై ప్రత్యేకంగా దృష్టిపెడతామని తెలిపారు.
దేశంలో పూర్తి స్థాయిలో నగదు రహిత లావాదేవీలు జరగాలంటే ప్రజల్లో పరివర్తన రావాలని చంద్రబాబు అభిప్రాయపడ్డారు. డిజిటల్ కరెన్సీతో.. ప్రభుత్వాలు, ప్రజల ఆదాయం పెరుగుతుందని అన్నారు. అవినీతి రహిత పాలనతో పాటు పారదర్శకత పెరుగుతుందని చంద్రబాబు చెప్పారు.
ప్రజలు, వ్యాపారులు డిజిటల్ లావాదేవీల వైపు మ‌ళ్లేందుకు ప‌న్నులు త‌గ్గించాలని సబ్‌కమిటీ సూచించింది. డిజిటల్ లావాదేవీలపై వారం రోజుల్లో ప్రధానికి మ‌ధ్యంత‌ర నివేదిక ఇవ్వనుంది.
Leave a Reply