సంచలనం సృష్టించిన ఆయేషా మీరా హత్య కేసు ఇంకా కొలిక్కి రావడం లేదు. హైకోర్టు సత్యంబాబును నిర్దోషిగా ప్రకటించడంతో ఈ వ్యవహారం మళ్లీ మొదటికొచ్చింది. మరి ఈ కేసులో ఏపీ ప్రభుత్వం ఎలా ముందుకెళ్లబోతోంది, ఆయేషా మీరా తల్లికి సీఎం ఎలాంటి హామీ ఇచ్చారు, పోలీసులు కేసును ఎలా డీల్‌ చేస్తారు, సుప్రీం కోర్టుకు వెళతారావెళితే ఎలాంటి వాదనను వినిపిస్తారు పదేళ్ల క్రితం సంచలనం సృష్టించిన ఆయేషా మీరా హత్య ఇప్పటికీ ఓ సంచలనమే… కేసు విచారణ నుంచి మొత్తం ట్విస్ట్‌ల మీద ట్విస్టులే… ముందు రౌడీషీటర్‌ లడ్డూ పేరు తెరపైకి వచ్చింది. తర్వాత సత్యంబాబును పోలీసులు అరెస్ట్ చేశారు. విజయవాడ మహిళా సెషన్స్‌ కోర్టు యావజ్జీవ కారాగార శిక్ష విధించింది. కాని లాయర్‌ శ్రీనివాస్‌ పోరాటంతో… దాదాపు ఎనిమిదేళ్ల తర్వాత ఈ కేసులో హైకోర్టు సంచలన తీర్పును ఇచ్చింది. సత్యంను నిర్దోషిగా విడుదల చేసింది. ఈ తీర్పుతో ఈ కేసు మళ్లీ మొదటికొచ్చింది. హైకోర్టు తీర్పు తర్వాత ఆయేషా మర్డర్‌ కేసు పెద్ద మలుపు తిరిగిందనే చెప్పాలి. ఆయేషా మీరా తల్లి శంషాద్ బేగం మహిళా కమిషన్‌ చైర్మన్‌ నన్నపనేని రాజకుమారిని.. సీఎంను కలిశారు. తమకు న్యాయం చేయాలని కోరారు. ఈ కేసుపై సమగ్ర విచారణ జరిపి న్యాయం చేస్తామని సీఎం హామీ ఇచ్చారు. నిబద్ధత కలిగిన అధికారులతో కేసును మళ్లీ రీ ఓపెన్‌ చేయించాలని… ప్రతిపక్ష నేతగా చంద్రబాబు ఆనాడు ఇచ్చిన మాటను నిలబెట్టుకోవాలనీ శంషాద్ బేగం అంటున్నారు. తమకు చంద్రబాబు న్యాయం చేస్తారన్న నమ్మకం ఉందన్నారు. ఆయేషా మీరా హత్య కేసులో మహిళా కమిషన్‌ కూడా విచారిస్తుందని.. కమిషన్‌ చైర్మన్‌ నన్నపనేని రాజకుమారి అన్నారు. సత్యంబాబును కోర్టు నిర్దోషిగా తేల్చింది కాబట్టి… అసలు దోషులెవరో తేల్చాలన్నారు. హైకోర్టు సత్యంబాబును నిర్ధోషిగా తేల్చటం పోలీసులకు పెద్ద షాక్. అన్ని ఆధారాలు సేకరించిన తర్వాతే సత్యంబాబును కోర్టులో హాజరుపరిచారని అంటున్నారు. అయితే ఎక్కడ కథ అడ్డం తిరిగింది? ఇప్పుడు అది తెలుసుకునే పనిలో ఉన్నారు. కోర్టు తీర్పు పేపర్లను క్షుణ్ణంగా చదువుతూ న్యాయమూర్తులు ఎక్కడ లోపాలు ఎత్తి చూపారో పరిశీలిస్తున్నారు. ఆయేషా హత్య కేసులో సత్యంబాబుకు ఎలాంటి సంబంధం లేదని బాధితులు కూడా చెబుతున్నారు. మరి ఈ కేసు భవిష్యత్‌ ఏంటి? ఈ కేసులో ఇప్పటికైనా ఆయేషా తల్లికి న్యాయం జరుగుతుందా? పోలీసులు అసలు దోషుల్ని పట్టుకోగలరా? సుప్రీంకోర్టులో పిటిషన్‌ వేస్తారా? అసలు ఈ కేసు రీ ఓపెన్‌ అవుతుందా? ఆయేషా కేసులో పోలీసులు నెక్స్ట్‌ స్టెప్‌ ఏంటి?
Leave a Reply