అన్యోన్యమైన దాంపత్యంలో అనుమానం చిచ్చుపెట్టింది. ఉద్యోగం చేస్తున్న భార్యను అనుమానించిన మొగుడు.. మానసికంగా వేధించాడు. భర్తతో వేగలేక ఆమె పుట్టింటికి వెళ్లి బతకుతోంది. అయినా వాడు వదల్లేదు. షాడోలా ఫాలో చేశాడు. కట్టుకున్న భార్యనే కిడ్నాప్ చేసి ఎత్తుకెళ్లాడు. దారుణంగా గొంతు పిసికి చంపేశాడు. క్షణికావేశంలో చేసిన తప్పునకు ఇద్దరు పిల్లలు అనాథలయ్యారు.
భద్రాద్రి కొత్తగూడెం జిల్లా ఇల్లందుకు చెందిన పద్మకు ప్రభాకర్‌తో 13ఏళ్ల క్రితం పెళ్లయ్యింది. వీరికి బాబు, పాప ఉన్నారు. పద్మ ఖమ్మం జిల్లా పరిషత్‌లో టైపిస్టుగా ఉద్యోగం చేస్తోంది. ప్రభాకర్ ఖమ్మంలో రియల్ ఎస్టేట్ వ్యాపారం చేస్తున్నాడు. తోదోడువాదోడుగా ఉన్న భార్యను అనుమానించాడు ప్రభాకర్. రెండేళ్ల నుంచి వేధించడం మొదలుపెట్టాడు. భార్యాభర్తల మధ్య గొడవలు జరగడంతో ఏడాది నుంచి ఇల్లందులోని పుట్టింట్లోనే ఉంటోంది పద్మ. భార్య దూరంగా ఉండటంతో ప్రభాకర్ సైకోలా మారిపోయాడు. ఆమెపై కసి పెంచుకున్నాడు. పద్మను ఎలాగైనా కడతేర్చాలని స్కెచ్ వేశాడు.
పద్మ ఎప్పటిలాగే గురువారం ఆఫీస్ ముగించుకుని సాయంత్రం ఆరింటికి ఇంటికి బయలుదేరింది. రాత్రి ఏడున్నర గంటలకు ఇల్లందు చేరుకుంది. అప్పటికే అక్కడ ఆమె భర్త ప్రభాకర్ కాపుకాశాడు. మరో ఇద్దరిని తోడుగా తెచ్చుకున్నాడు. ఇంటికెళ్లేదారిలో పద్మను ఆటోలో ఫాలో చేసి కిడ్నాప్ చేశాడు. అయితే ఆటోలో ప్రభాకర్-పద్మ మధ్య ఘర్షణ చోటుచేసుకుంది. అప్పటికే పూటుగా తాగిన ఆ దుర్మార్గుడు.. కోపోద్రిక్తుడయ్యాడు. భార్య పద్మను ఆమె చున్నీతోనే గొంతు బిగించి చంపేశాడు. మోట్లగూడెం వెళ్లే రహదారిలో పద్మ డెడ్‌బాడీని పడేసి పారిపోయాడు ప్రభాకర్.
రాత్రి కూతురు ఇంటికి రాకపోవడంతో పద్మ తల్లి పోలీసులకు ఫిర్యాదు చేసింది. సీన్‌లోకి ఎంటరైన పోలీసులు దర్యాప్తు ప్రారంభించారు. కిల్లర్ మొగుడు ప్రభాకర్‌ను అదుపులోకి తీసుకున్నారు. తమదైన స్టైల్లో విచారించే సరికి మర్డర్ చేసినట్టు ఒప్పుకున్నాడు. పద్మ మరణంతో ఆమె కుటుంబ సభ్యులు విషాదంలో మునిగిపోయారు. ఇద్దరు చిన్నారులు అనాథలయ్యారు.
Leave a Reply