ప్రజలకు లబ్ది చేకూర్చాలన్న ప్రభుత్వ ఆశయానికి….అక్రమార్కుల తూట్లు

ప్రజలకు లబ్ది చేకూర్చాలన్న ప్రభుత్వ ఆశయానికి..  అక్రమార్కులు తూట్లు పొడుస్తున్నారు. కోట్లాది రూపాయల ప్రభుత్వ ధనాన్నిస్వాహా చేస్తున్నారు. వారికి కొందరు ప్రభుత్వాధికారులు కొమ్ముకాస్తున్నారు. తెలంగాణ, ఆంధ్రప్రదేశ్ రాష్ట్రాల సరిహద్దుల్లోని  ఖమ్మం జిల్లా తుంబూరు గ్రామం కేంద్రంగా గొర్రెల  అక్రమ రవాణా  కొనసాగితుంది

చూశారుగా.. యాదవుల జీవనోపాధి మెరుగుపరిచేందుకు ప్రభుత్వం పంపిణీ చేసిన గొర్రెలు.. ఎలా పక్క రాష్ట్రాలకు తరలుతున్నాయో. గొర్రెలను తక్కువ ధరకు కొనేందుకు దళారులు లబ్దిదారులను భయభ్రాంతులకు గురిచేస్తున్నారు.  డబ్బు ఆశ చూపుతూ కొంతమంది.. పశుగ్రాసం లేక ఉన్న గొర్రెలు చనిపోతే ఆ డబ్బు కూడా రాదంటూ వారిని భయాందోళనకు గురి చేస్తున్నారు. దీంతో లబ్దిదారులు వచ్చిన కాడికి వాటిని అమ్మేస్తున్నట్లు టీవీ5 నిఘాలో తేలింది.

తెలంగాణ రాష్ట్ర ప్రభుత్వం యాదవ, కురమ, గొల్లలకు వారి జీవనోపాధి కల్పించేందుకు సబ్సిడీపై గొర్రెలను అందించింది. 19గొర్రెలు, పొట్టేలు కలిపి ఒక యూనిట్ గా అందించింది. లబ్దిదారుని ఇచ్చే గొర్రెలకు రవాణా ఖర్చులతో కలిపి మొత్తం లక్షా 10వేల రూపాయలు చెల్లిస్తుంది. సత్తుపల్లి పరిధిలో సుమారు 4వేల యూనిట్లను అధికారులు లబ్దిదారులకు పంపిణీ చేశారు. గుర్తుపట్టేందుకు ప్రతీ గొర్రెకు ట్యాగ్ కూడా వేశారు.

సబ్సిడీ గొర్రెలను స్వాహా చేసేందుకు తెలంగాణ,  ఆంధ్రప్రదేశ్ రాష్ట్రాల సరిహద్దు గ్రామాల్లో దళారులు తిష్టవేశారు. ఖమ్మం జిల్లా సత్తుపల్లి మండలం తుంబూరు గ్రామాన్ని అడ్డగా చేసుకుని.. 10మంది దళారులు సమీప గ్రామాల నుంచి గొర్రెలను సేకరిస్తున్నారు. పశు సంవర్ధక శాఖ అధికారుల అండదండలతోనే.. రాష్ట్రం దాటించేస్తున్నారు. మొత్తం వ్యవహారంపై పక్కా సమాచారం అందుకున్న టీవీ5 తుంబూరు గ్రామంలో నిఘా పెట్టింది. కీలక ఆధారాలు సేకరించింది. గొర్రెలకు ఉన్న ట్యాగ్ లను తొలగించి.. కొన్నింటిని ఆంధ్రప్రదేశ్‌లోని  మాంసం దుకాణాలకు తరలింస్తుండగా.. మరికొన్నిటిని కొత్త ట్యాగ్ లు వేసి అధికారులే వేరే రైతులకు పంపిణీ చేస్తున్నట్లు తేలింది.

ప్రభుత్వ ఆశయానికి అక్రమార్కులు తూట్లు పొడుస్తున్నా.. ఉన్నతాధికారులు స్పందించకపోవడం అనుమానాలకు తావిస్తోంది. ఇప్పటికైనా అధికారులు సబ్సిడీ గొర్రెల అక్రమ రవాణాపై దృష్టి సారిస్తే.. భారీ కుంభకోణం వెలుగులోకి వచ్చే అవకాశముంది